South Cotabato—balik silda ang usa ka pugante human nasikop sa awtoridad human sa duha ka tuig nga pagtago-tago niini sa tinugyanan sa balaod.
Ang suspek giilang si Ryan Kamid Haliden, legal age, residente sa Barangay Bentong, Polomolok, South Cotabato, kanhing preso sa South Cotabato Rehabilitation Center kansa may kasong kalapasan sa Republic Act 9165 (Comprehensive Dangerous Drugs Act of 2002).
Una nang nasikop sa Kapulisan nga sakop sa Lutayan Municipal Police Station ang suspek sa Barangay Tamnag, Lutayan, Sultan Kudarat human kining nakuhaan ug eksplosibo. Wala na kapalag ang suspek tungod nakorner kini sa kapulisan.
Nakasibat ang suspek niadtong tuig 2015 samtang kini nagpatambal sa South Cotabato Provincial Jail human iyang naisahan ang mga jail guards nga nagbantay kaniya. Sa karon anaa na sa South Cotabato Rehabilitation Center ang nasampit nga suspetsado.
