Davao City – Gipatin-aw karon ni Assistant Secretary for Commuter Affairs Elvira Medina sa Department of Transportation (DOTr) nga walay mahitabong phase out sa mga karaang Public Utility Jeepney units (PUJs) kon dili, ang pag-improbar sa nasangpit nga mga yunit-panakayan.
Sa radio social commentary program ‘Straight to the Point,’ gi-usa usa’g batbat ni Medina ang mga alegasyon kun concern sa mga taga-transportation sector nga ang usaka direktang epekto kun implikasyon sa modernization program mao ang pag-‘kulob sa ilang kaldero.’
Sa atong panuki-duki, atong nahibaloan nga ubos sa DOTr ug LTFRB PUJ modernization scheme, hatagan ug asistinsiya-pinansiyal ang mga tigdumala sa mga PUJ vehicles aron usbon ang porma sa maong ‘common carrier.’
Kalakip usab diha sa maong public transport scheme mao ang pag-overhaul sa engine mechanism niini lakip na ang pag-explore sa posibilidad nga hinay-hinay na kitang mobiya gikan sa dependence sa ‘fossil fuel’ sama sa diesel ug mo-upgrade ngadto sa mga ‘environment-friendly fuel sources’ sama sa bio-diesel ug bag-ong porma sa gitawag nga mga ‘e-vehicles.’
Gitino ni Medina nga tumong sa nasangpit nga programa mao ang pag-improbar sa engines haron mas efisyente ang ilang operasyon ug aron mas modoble pa ang inadlaw-adlaw’ng kinitaan sa mga yanong driver.
Nagpasidaan usab si Medina ngadto sa publiko nga dili magpa-ilad sa ginahimo sa pipila ka mga anaa sa transport sector sama niadtong nagpasiugda sa ‘Tigil-Pasada’ karon ug ugma gamit ang isyung PUJ phaseout.
RadyoMan June Duterte
