Davao City – Nagpadayon karon ang ginahimo sa City Transport and Traffic Management Office (CTTMO) nga tagging kun pagpapilit og mga stickers sa mga public utility jeepneys (PUJs) syudad sa Davao.
Sa interbyu sa DXDC RMN Davao kang Bonifacio Capricho Jr., Operations Head sa CTTMO, gibutyag niini nga tumong sa maong lakang nga masayran kung pila kabuok ang mga rehistradong PUJs nga nagabiyahe padulong sa downtown area sa dakbayan.
“Mao nay identification nga based sa ruta nga gidaganan nila diha namo mabutangan og pila kabuok sakyanan kay naa man mi record ana. Sa ato pa, kung musobra, buot pasabot daghan diay kaayo nagdagan nga mga colorum, nga wala ma rehistro,” saysay ni Capricho.
Gibutyag ni Capricho nga unang gipang tatakan sa CTTMO ang mga sakyanan nga adunay rutang Toril, Bago Gallera, Bago Aplaya, Catalunan Grande ug Matina Pangi.
Nasayran nga kabahin ang maong lakang sa ipatuman nga High Priority Bus System (HPBS) sa syudad ug pamaagi usab kini aron masuta ang mga benepisyaryo sa ayuda sa gobyerno sa apektadong mga indibidwal.
RadyoMaN Kirby Manzon
