Con un pulis y su tres maga compaƱero ya aresta el maga pulis del Central Police Station despues ya aparese el diila nombre como responsable na matansa con el un police asset na Baliwasan del Abril a-primera.
Con el maga suspechao ya conose como canda PO2 Perry Glen Mani Climaco, de Baliwasan y assigned na Ipil Maritime Police na Ipil, Zamboanga Sibugay, Kirt Anthony Alvarez de Bolalan, Reymark Ponce de Sinunuc y si Neil Aldrin Aguilar de Luyahan.
Pero el tres maga suspechao ya insinia con Climaco como el persona quien ya tira con Joselito Gonzaga Manolong, 34, casao del Atis Drive, Baliwasan del Domingo serca man madrogada.
Primero el maga pulis ya aresta con Alvarez na su casa y ya canta este con el maga pulis si quien-quien sus maga uban donde ya resulta na aresto di canda Ponce y Aguilar.
Enantes aga ya apunta el maga pulis na Ipil, Zamboanga Sibugay donde ya resulta na aresto di Climaco quien aquel tiempo na duty.
Asegun el victima si Manolong man amigo lang y el maga suspechao donde ta mira el maga pulis droga el motive del matansa porcausa un informante del pulis el victima.
