PULIS, ADUNA NAY PERSONS OF INTEREST NGA GI-IMBESTIGAHAN KALABOT SA PAGKAMATAY SA DOSE ANYOS NGA BATA TUNGOD SA SA-AG NGA BALA

29

Aduna nay gi-imbestigahan ang kapulisan sa Sapad, Lanao del Norte nga lima ka mga persons of interest kalabot sa pagkamatay sa dose anyos nga batang babaye tungod sa sa-ag nga bala, alas-12:00 sa tungang gabii niadtong Biyernes, Enero 1.

  Matud pa ni Lt. Elric Palanas, hepe sa Sapad police, mga silingan sa bata ang gitan-aw nga mga persons of interest sa kamatayon ni Suzette Manamparan.


  Miingon si Palanas nga gitakdang ipailawom sa paraffin ug ballistic test ang lima tungod kay usa kini sa mga pamaagi nga masuta kung kinsa kanila ang nagpabuto og armas niadtong higayona.  

Nag-base, matud pa, ang pulis sa ilang validation, investigation ug intelligence gathering sulod sa 70 ngadto na 100 meter radius sa dapit kung asa kalit nga natumba ang bata samtang nagdula kauban ang iyang mga higala ug mga ig-agaw.  

Mamahimong kabahin sa imbestigasyon ang cross matching sa mga armas nga makuha gikan kanila ug sa bala nga nakuha sa ulo sa bata nga kalibre 45.  

Kung kahinumduman nga kalit natumba ang bata samtang nagtindog atbang sa ilang balay. Dali kining gidala sa tambalanan sa lungsod sa Kapatagan tungod sa dugo nga mi-agas gikan sa iyang ulo.  




Matud pa ni Emilyn Abrigondo Manamparan, inahan sa bata, gikan sa simbahan ang iyang anak pipila ka oras lang dihang nahitabo ang insidente.  

Panawagan sa inahan nga makunsensiya ug mosurender na ang nagpabuto ug nakapatay sa iyang anak aron mahatagan og hustiya ang kamatayon niini. 

Facebook Comments