Ginapatihan nga suspek sa pagluthang kay PO1 Dorben “Benjo” Acap ang isa ka pasyente nga gindala sa Western Visayas Medical Center kaina sang hapon pila ka minutos matapos magluntad ang insidente sa Sitio Paho, Dulunan, Arevalo.
Ginpahayag ni Police Sr. Inspector Mary Grace Borio, hepe sang Arevalo PNP nga nahibaluan nga isa ka pulis ang pilason nga pasyente nga gindala sa WVMC kag ini ang ginkilala kay PO2 Melvin Mocoro.
Sa pihak sini, indi pa makumpirmar ni Borio kon ang nasambit gid man nga pulis ang nagluthang kay PO1 Acap.
Samtang sa imbestigasyon sang Arevalo PNP, ginapahayag nga naggitgitanay sa trapiko ang salakyan ni PO1 Acap kag ang motorsiklo nga ginasakyan sang mga suspek nga nagresulta sang pagtiruhay.
Indi man makumpirmar ni Borio kon may kaangtanan sa pagka-high value target ni Acap ang pagluthang diri sang mga suspek.
Suno kay Borio nga ila pa ginapadaluman ang nasambit nga insidente.
