ZAMBOANGA CITY—Un pulis y dos otro maga compaiero ya salearestao duarnte el un drug buy bust operation ya conduci na Kasalamatan Drive, Kasanyangan del Miercoles por la noche.
Con el maga arestao ya conose como canda PO1 Baser Talaji Mohammad, 36, assigned na CPHAU na City Police Office quien aquel tiempo de uniporme pa de PNP cuando ya aresta conele y residente de Ayala, Al Hafidz Omar y Akil, 29, Harija Sadjail Hayudini, 48, del mismo lugar.
Canila ya aresta el maga miembro del Station Drug Enforcement Team del Police Station 11 que encabesa si Chief Insp. Elmer Perez Solon banda alas 9:30.
Na report del pulis ta aparese que el target del maga pulis amo si Omar pero ya espanta ya lang sila cuando ya alcansa na acto con Mohammad ta puma shabu durante el buybust operation.
Si Hayudini amo el duenio del casa.
El maga pulis ya recobri desde na posesion di Mohammad 9 paquete de shabu mientras tres tambien paquete de shabu ya confisca desde con Omar.
Maga pulis ya recobri tambien el marked money desde con Omar.
Conel maga suspechao ya detene na estacion del pulis mientras el maga confiscao shabu ya entrega na PNP Crime Laboratory.
Maga pulis ta prepara ya el proprio caso que planta contra conel maga arestao. – Dan Toribio
