Patay na’ng nahidangat sa balay tambalanan ang usa ka pulis nga nagmaneho sa single motor ug aksidenting nibangga sa barikada sa gimontar nga Control Checkpoint didto sa nasudnong dalan sa Purok 6, Brgy. Sanghan, Cabadbaran City, Agusan del Norte.
Giila ang biktima nga si PMSgt. Lester Almazan Cannen, 43 anyos, minyu ug residenti sa North Town Subdivision, Block 1, Lot 47, Libertad ning syudad sa Butuan.
Migawas sa imbistigasyon nga nagmanehu ang biktima sa iyang itom nga Yamaha Mio Aerox nga adunay temporaryong plaka numero 1501208288 gikan sa lungsod sa Tubay, Agusan del Norte ug padulong dinhi sa dakbayan sa Butuan apan paghidangat niini sa nahisgutang lugar aksidenti kining mibangga sa Quarantine Control Point nga gimontar sa Local Task Force sa dakbayan sa Cabadbaran ug miresulta sa seryosong mga angol ang iyang naangkon.
Daling gidala ang biktima sa Cabadbaran District Hospital apan gideklara kining dead on arrival pinaagi ni Dr. Brenda Lee Tampos.
Natigayon ang aksidenti bandang alas 8 ang takna kagabie. Sa karon anaa pa sa Cabadbaran District Hospital samtang ang motorsiklo gikustodiya sa kwerpo sa kapulisan.
