Pulis muerto na tiro

Muerto el un pulis despues ya rega de bala conele uno del maga suspechao illegal drag racer na Nuñez Extension enante aga.
Con el victima ya conose como si Patrolman Pedro Umpad, designao na Patrol Section del Central Police Station y residente de Tumaga.
Asegun na report, serca man alas 4 del aga ta rendi duty si Umpad hunto consu uban si Patrolman Adamer Pandangan cuando ya columbra estos con el grupo de motor que possible maga illegal drag racers.
Ya atraca el dos pulis para verifica pero uno del maga ancas uban del grupo derepente ya rega de bala con Umpad.
Ya puede pa imbisti si Pandangan pero ulihi nuay mas rebenta su pistola y aqui ya puede ya escapa el maga suspechao y ya entabla para na Governor Camins Avenue.
Maga investigador ta recobri 7 capsula de calibre 45 pistola y dos capsula con uno bala de 9mm pistola na lugar del incidente.