BACOLOD CITY – Na-involve sa isa ka shooting incident ang isa ka police personnel sa insidente nga natabo sa Circumferential Road, Akishola Village, Brgy. Villamonte, Bacolod City kagab-i.
Nakilala ang police nga si PO1 Ely Agonace, 26 anyos ang edad, single kag pumulyo sang Brgy. Vista Alegre, Bacolod City, assigned sa Regional Mobile Force Batallion 1st Company, Alimodian, Iloilo.
Ang mga biktima ginkilala nga sanday Edgar Marinog kag Mario Lazazaga, lunsay legal ang edad.
Base sa imbestigasyon, may mga las 10:30 kagab-i sang natabo ang traffic altercation sa tunga sang pulis kag sang mga biktima nga sakay sang isa ka canter nga ginapanag-iyahan sang Columbia Marketing.
Sa tunga-tunga sang paglalisay sang amo nga pulis kag sang mga biktima, hinali na lamang niya sini nga gintiro sanday Marinong kag Lazaga kon diin naigo sa iya naibabaw nga bahin sang wala nga abaga si Marinog kag naigo man nga tuo nga portion sang windshield sang canter.
Sa karon ginahanda na ang kaso nga violation sang Comelec Resolution number 10917 ukon Comelec gun ban kag kaso criminal kag administratibo nga igapasaka batuk kay Agonace.
Detained karon sa custodial facility sang Police Station 4 ang suspek, samtang ang biktima naman ang padayon karon nga confined sa Corazon Locsin Montelibano Memorial Regional Hospital.
Nakuha sa scene of the crime bilang ebidensya ang isa ka Glock 17 Gen 4 nga may magazine, 5 ka fired cartridge kag isa ka wala napalupok nga cartridge.
Angut sini, ginpasiguro ni Bacolod City Police Office OIC City Director PSSupt. Francisco Ebreo nga wala sang cover up nga matabo sa imbestigasyon sa kaso ni Agonace./dyHB BACOLOD
