General Santos City— Gipaklaro ni PO1 Rasel Blabagno Jr, nga usa ka wala pagsinabtanay ang nahitabo tali kaniya ug sa security guard sa Tierra Montana nga si Crispin Bello Ugalde, 50 anyos.
Sumala niya nga nangayo na siya ug dispensa sa nasangpit nga reklamante human sa maong panghitabo ug ilaha na matuid pa kining na-settle. Pamahayag niini nga wala siya nasayud kung nganong misangko pa ngadto sa pagpa-blotter ang nahisgutan.
Dugang pamahayag ni PO1 Blabagno nga naka-inom siya niadtong panahuna, apan iyahang gihingusgan nga wala niya gitiunan ug pusil ang nahisgutan sekyu.
Pag-angkon niya nga iyahang nasultian ug dili maayo ang maong security guard gumikan sa epekto sa ilimnong makahubog. Kung asa iyahang gibutyag nga unsa man ang dangatan sa maong insidente, andam matud pa siya nga kini atubangon.
Pagpaklaro niya nga tapos na ang iyahang duty isip miyembro sa motorcycle cops dihang misulod sa maong establishemento uban ang iyahang mga higala.
