Pulis nga miresponde sa ‘hostage-taking’ sa Samal, gi-atsa sa suspek

Davao City – Anaa na sa luwas nga kahimtang ug nakagawas na sa hospital si Police Lieutenant Colonel (PLtCol.) Reny Valdesco, Acting Chief of Police (COP) sa Island Garden City of Samal (IGaCoS) PNP human nasamdan sa pagresponde sa hostage-taking incident sa Barangay Sta. Cruz, Talicud Island, Kaputian District, IGaCoS niadtong Pebrero 18, 2022.

Sa interbyu sa DXDC RMN Davao kang Police Major Leo Arvin Alce, Station Commander sa IGaCoS PNP, gisaysay niini nga daling girespondehan sa kapulisan ang insidente diin si Col. Valdesco ang nahimong main negotiator sa suspek nga si alias J0ng, 33 anyos, mag-uuma, bulag sa asawa ug residente sa naasoy nga lugar.

Luwas nga nakagawas ang mga menor de edad, apan samtang ginapa-surrender sa pulis ang suspek, nisukol kini ug naigo sa atsa si Valdesco nga dali usab nga nadapatan og first aid ug gidala sa Davao del Norte Hospital – IGaCoS Zone.

“Kalitan niya og grab ang atsa. Tapos nakabantay man (ang suspek), mao ‘to nga naigo ang atong Chief of Police (Col. Valdesco) sa gilid sa iyang ulo,” saysay ni Alce.

Wala nay plano ang police official nga mukaso sa suspek human nasayrang aduna kini problema sa pangisip ug gitakdang isulod sa Mental Hospital sa Davao.

Gikustodiya na sa City Social Welfare and Development Office (CSWDO) ang duha ka mga menor de edad.

RadyoMaN Kirby Manzon