Davao City – Gipaubos na sa restriction custody sa Police Regional Office 11 ang pulis nga nanghulga og magtutudlo sa usa ka eskwelahan sa lungsod sa Lupon Davao Oriental sa miaging adlaw.
Suma ni PRO 11 Director Police Chief Superintendent Marcelo Morales nga iya nang gipadisarmahan si SPO1 Inocentes Talleon kinsa na-assign sa Davao Oriental Provincial Mobile Force Company samtang gipaubos na kini sa restriction custody.
Gikumpirmar pa ni Morales nga miganar na karon ang ilang gilusad nga imbestigasyon sa reklamo sa magtutudlo sa Davao Oriental Lupon Elementary School nga si Eva Carbo.
Sa inisyal nga imbestigasyon, gikumpronta matud pa ni Talleon si Carbo human naparot ang iyang anak sa taekwando event kung asa coach ang biktima sa nagpadayon nga sports meet nga natigayon sa lungsod sa Banay-Banay Davao Oriental 3:50 Domingo sa hapon.
Misuway matud pa og pagpasabot si Carbo ngadto sa pulis apan wala kini nagpanumbaling sa katarungan ug pipila ka minuto gikan sa pagbiya mibalik ang suspek nga ma’y bitbit na nga M16 rifle armalite nga gikalisang sa ubang mga atleta ug mga estudyante.
Dugang ni Carbo, lango sa binong si Talleon dihang gibuhat niini ang pagpanghulga ngadto sa magtutudlo.
Sa karon, anaa na sa pagkuha og mga affidavit sa mga testigo ang mga imbestigador aron ikasuporta sa pagpatindog sa kasong administratibo nga gisang-at ni Carbo batok sa abusadong pulis.
RadyoMaN Joel Viray
