General Santos City—nanganti si Police Sr. Superintendent Romeo Ruel Berango, City PNP Director sa Gensan City Police Office nga iyang ipalabay sa layo nga lugar ang Pulis nga nanuok sa gikaingong uyab niini sulod sa Golden State School Campus niadtong adlawng Lunes, August 28, 2017.
Sumala ni PSSUPT Berango nga iyang ipa-relieve si PO1 Charlie Capaque nga nakabase sa Police Station 1 ug ipalabay sa ubang lugar. gikumperma sa opisyal nga siya nag request na ug relieve order ngadto sa Police Regional Office-12 alang kang PO1 Capaque.
Gihingusgan pa ni Col. Berango nga dili niya itolerate ang sama niining hinimuan sa iyang mga sakop.
Dungan sa iyang paglingkod isip OIC City PNP Director sa Gensan, usa sa iyang mando sa tanang Gensan Police nga ipabilin ang dignidad sa kapulisan ug dili malambigit sa unsa mang iligal nga gimbuhaton ug mga kontrobersiya.
Dili usab angayan nga malambigit sa pagpang-abuso ang pulis bisan pa nga iya kining uyab o miyembro sa pamilya atubangan sa publiko.
Ang samang mga pulis dapat ilabay matud pa sa layo nga lugar aron nga masuwayan ang kaisog.
Samtang gimanduan usab ni Col. Berango ang hepe sa Police Station 1 nga si Police Chief Inspector Jovenson Bayona nga magpahigayon ug imbistigasyon kalabutan sa gikalambigitan sa iyang sakop.
Kahinumduman nga una nang gireklamo ang nasampit nga pulis sa tag-iya sa Golden State College nga si Warren Manilay ug gikaingong uban niini nga si Alias Charise, 19 anyos, estudyante ngadto sa Police Station 3, human kining nisulod sa tunghaan dayon gituok ang biktima.
