Pulis nga Napilde sa Sabong, Nanghasi, Nagpabuto ug Armas, Nagpaila’ng Maute – Gipaslak sa Karsel sa Police Station 3

705

Gipaslak sa karsel sa Police Station 3 ang hubog nga pulis nga sakop sa Butuan City Public Safety Company (BCSPC), human nanghasi, nanglaparo ug sibilyan, nagpabuto ug armas ug nagpaila pa’ng sakop siya sa Maute group – taliwala sa sabongan sa Brgy. Lumbucan ning syudad sa Butuan, kinsa gikatahung napilde sa sabong.

Napilde ug 15 mil pesos sa sabong si PO2 Rogelio Fortun Montadas Jr., residente sa Emily Homes Brgy. Libertad ning dakbayan sa Butuan, samtang niadto kini sa Brgy. Lumbucan kagahapon.

Gitumbok nga ang iyang dakung pilde sa sabong ang hinungdan nganong nanghasi kini ug kalit lang misulod sa panimalay ni Herminda Montejo dayug singgit nga mopahawa ang tagbalay aron dili sila mangamatay ug nagpatoo pa siyang sakop sa Maute.


Gitamparos pa sa maong pulis ang sibilyan nga si Rene Dumagit, taga Ochoa Avenue ning syudad, ug nagpabutu sa kalibre .45 nga pistola kaduha ka higayun hinungdan sa kalisang sa mga sibilyan.

Samtang daw sa milupad ang espiritu sa kahadluk ni Inday Vertudazo Andrada sa dihang sa ila mipunterya ang kasuku sa maong pulis.

Kasong alarm scandal ug uban pa ang atubangon ni PO2 Montadas.



Gipaniguru ni PO2 Bernard Amora, imbistigador sa Police Station 3 nga dili nila paboran ang suspek nga usa usab ka pulis.


Facebook Comments