General Santos City–Patay ang usa ka pulis atol sa gihimong buybust operation sa Polomolok PNP ug RID sa Barangay Magsaysay, Polomolok, South Cotabato.
Giila ang nasampit nga pulis nga si PO2 Ernie Sagabay nakabase sa regional Police Holding and Accounting Unit, ug residenti sa Polomolok, South Cotabato.
Sumala ni Police Supt. Aldren Gonzales, Spokesperson sa Police Regional Office-12 nga nagpahigayon ug buybust ang kapulisan batok sa suspek apan nakamatikod kini nga mga pulis ang iyang nakatransaksyon mao nga mibunlot kini ug pusil ug nakigpinusilay sa mga pulis, hinungdan nga napugos ang kapulisan nga kini pusilon.
Nadala pa sa ospital ang biktima apan gideklara kining dead on arrival. Narekober gikan sa posisyon sa suspek ang upat ka sachet sa gituohang shabu ug P1,000 nga marked money.
Gikumperma ni Supt. Gonzales nga una nang nasikop ang nasangpit nga pulis niadtong July 10, 2018 gumikan sa paghupot ug dili lisensyadong armas atol sa gihimong ronda sa kapulisan didto sa maong lugar.
Nakapyansa ang maong pulis maong nakagawas sa prisohan. Human nakagawas sa lock up cell sa kapulisan didto na kini gibutang sa RPHAU. Samtang anaa usab kini sa listahan ni Pangulong Rodrigo Duterte sa mga lambigit sa iligal nga droga sa nasud.
