Davao City – Pasado alas 12 sa udto kaganiha dihang naahat pagpanganak ang usa ka ginang sulod sa gisakyan niining trisikel gawas sa may Barangay Health Center sa may Bunawan ning syudad.
Daling niresponde ang mga personahe sa Bunawan PNP ngadto sa maong babae human kini nangayo og tabang.
Niasister sa pagpaanak si PO2 Dominique Villamor kinsa usa ka registered nurse.
Ang maong babae magpacheck-up unta sa health center apan sirado kini ug wala na damha nga manganak na kini atong orasa.
Luwas nga nahimugso ang usa ka batang lalaki ug daling gisakay sa patrol car ang mag-ina.
Gihatod kini sa mga pulis didto sa Tibungco Doctors Acosta Medical Clinic.
Matud ni Villamor nga mapasalamaton siya sa maong oportunidad nga nakatabang siya ug maayo usab kay baon niini kanunay ang iyahang medical kits nga magamit sa mga emerhensiya.
Andam usab kini kung ugali mang kuhaon siya nga ninong sa maong bata.
RadyoMaN Aimee Guinita
