Serca man alas 6 este tarde cuando ya queda victima de tiro el un pulis na abahada del Tumaga.
El victima amo si Police Cpl. Edgar Gaganting, de Tumaga y designao na Culianan Police Station.
Tres tiro ya tupa na cabesa del victima que amo ya resulta na su muerte.
Ta aparese na report, esta na parte de Tumaga Press si Gaganting muntao na su motorsiclo y encamino ya para na centre del Tumaga y cuando ya llega esta na abahada parte del calsada tiene ya lang dos persona muntao na otro motorsiclo y el ancas ya refica de tiro conele.
Ya tumba si Gaganting y nohay mas este puede pa aranca su 9mm pistola.
Ya cay tambien el un reserva magazine Di Gaganting y hora le ya tumba.
Maga pulis ta encontra tambien un magazine de 45 pistola na lugar que possible ta dweña el maga hechor.
Tres capsula de 45 pistola ya recobri serca conel victima que este amo ya tira conele.
