Davao city – Nagluwat sa puwesto si Vice Mayor Paolo Pulong Duterte atol sa special session sa konseho karon lang hapon.
Gi-anunsiyo ni Bise Mayor Pulong Duterte ang pagkanaog sa katungdanan pinaagi sa privilege speech sa gipahigayon nga special session sa konseho karong hapon.
Pipila sa bug-at nga rason sa pagluwat sa bise mayor mao ang kapakyasan sa unang kaminyoon, pagdi-lahig sa isyu sa Bureau of Customs, ug bangi sa anak nga si Ysabel Duterte.
Sigun ni Pulong nga sa gagmay pa sila gipahinumduman sila sa ilang mga ginikanan labot sa pagpreserba sa dungog ug delikadeza mao nga miluwat kini sa puwesto tungod sa mao nga mga isyu.
Anaa si Mayor Inday Sarah Duterte-Carpio dihang gibasa ni Vice Mayor Pulong Duterte ang suwat sa iyang paghawa sa puwesto nga gikakurat sa tanan.
Dungan ani ang pagpasalamat sa opisyal sa mga dabawenyo nga misuporta ug misalig kaniya.
Sa karon, kasamtangan gipahigayon ang close door meeting.
Nakasentro ang special session sa konseho sa pagdeklara og state of calamity sa siyudad ug pag-aproba sa calamity fund nga magamit alang sa mga biktima sa trahedya.
RadyoMaN Joel Viray
