Roxas City, Capiz – Isa ka reklamo ang ginpasaka sa city council sang SK Treasurer nga si Arthur Japsay sang Brgy Inzo kontra kay Punong Barangay Einstein Okpora.
Ini amo ang grave misconduct and dishonesty bangud sa ginhimo ni Okpora nga pagpaguha sang pondo sang Sangguniang Kabataan sang Inzo sa pihak nga wala pa sang resolusyon nga nagatugot sa punong barangay nga gamiton ang budget sang Sangguniang Kabataan nga balor P60, 000 pesos para sa ginpatigayon nga liga sang basketbol sa ila barangay sang nakaligad nga Disyembre 2018 tubtob Enero 2019.
Suno kay City Councilor Garry Potato, igatugyan ang nasambitan nga reklamo sa committee on good government kun sa diin siya man ang chairman.
Diri pagalantawon kun may yara sang probable cause ang reklamo nga ginpasaka samtang natalana nga igapatawag sang city council ang kapitan sang Barangay Inzo kag ang tagreklamo nga SK treasurer nga si Arthur Japsay agud nga talakayon kun may yara sang merito ang reklamo nga ginfile sang complainant.
Suno sa iya nga bilang chairman sang committee on good government, pagahawiran sini ang kaso objectively base sa igapresentar sang nga ebidensya sang tagsa ka bahin.
Ginpaathag sini nga magapatawag anay sila sang committee hearing kun sa diin diri iga-determinar kun may yara sang probable cause ang kaso nga pagasundan sang committee report nga igasumiter naman sa city council.
Pahayag sini dugang, ang sangguniang panglungsod na ang bahala nga magdesider sa amo nga kaso.
