Dumalag, Capiz – Nagapangatubang subong sa kaso nga paglapas sa Republic Act 3019 ukon Anti-Graft and Corrupt Practices Act ang punong barangay, barangay treasurer kag pito tanan ka mga barangay kagawad sang Santa Carmen, Dumalag.
Ini ang may kaangtanan sang anomalya sa distribusyon sang pondo nga halin sa Social Amelioration Program ukon sa SAP sang gobyerno sang tiun nga ginpaidalom sa general community quarantine(GCQ) ang probinsya sang Capiz.
Suno sa hepe sang CIDG- Capiz nga si Police Major Chris Artemius Devaras, nakitaan sang probable cause ang kaso nga ginpasaka sang pila ka mga persona kontra sa amo nga respondents matapos nga gintugotan nga mahatagan sang SAP assistance ang tatlo ka benepisarsyo nga indi kwalipikado nga makabaton sang ayuda.
Isa sa mga nahatagan ang persona nga may yara sang single nga bata nga katapos sang Philippine Army. Samtang ang duha man ka mga nakakuha sang ayuda ang nahibaloan nga lunsay ang mga ini nga wala sang asawa.
Ang kaso nga paglapas sa Anti-Graft and Corrupt Practices Act kag kaso administratibo kontra kay Punong Barangay Rosemary Puyon kag pito ka mga kagawad kag treasurer ang ginfile sang CIDG-Capiz sa provincial Prosecutors Office bangud sa pagbayolar sa Paragraph VI-A sang MC no. 09 series of 2020 “THE OMNIBUS GUIDELINES IN THE IMPLEMENTATION OF THE EMERGENCY SUBSIDY PROGRAM OF THE DEPARTMENT OF SOCIAL WELFARE AND DEVELOPMENT”.
Kalakip sa mga napasakaan sang kaso amo ang mga barangay kagawad nga sanday Raymunda Faderugau y Focbit, 32-anyos; Benjamin Fuyon Jr. y Felecierta, 44-anyos; Romeo Felicierta y Crisosto, 51-anyos; Margarita Faucbit y Fajartin, 52-anyos; Potenciana Araña y Fortiza, 51-anyos; Allan Felicierta y Feril, 47-anyos; Jose Fuyunan y Frielas, 60-anyos; Rosalie Crisosto y Fuego, 42-anyos kag Barangay Treasurer Maria Fajartin y Mendoza, 62-anyos.
