Davao City – Magdepende ang tanan diha sa analysis ug pinal nga desisyon sa Local Government Unit (LGU) kon purok or household ba o barangay lockdown ang ilang ipatuman diha sa pakigbatok sa COVID-19 sa dakbayan.
Sa interview sa morning primetime radio social commentary program ‘Straight to the Point,’ gisugilon ni Barangay Captain Eduardo Millondaga sa Barangay 22-C ning dakbayan nga kon sa tan-aw sa lokal nga gobyerno mas epektibo ang purok or household lockdown, nan suportahan kini nila nga matang sa pandemic control measure.
Ang Barangay 22-C bag-ohay lang nakatala og upat ka kaso sa COVID-19 diin ang usa ka pamilya nga natakdan gidala ug gi-atiman na karon sa Southern Philippines Medical Center (SPMC).
Segun ni Millondaga, natakdan ang upat ka miyembro sa pamilya tungod sa usa ka binabaye nga taga-Barangay 23-C kinsa unang gibalibarang makasulod sa ilang barangay ug sa Barangay 21 hinungdan nga nasum-ok kini sa ilang barangay.
Ang maong binabaye kinsa positibo sa sakit sekreto diay nga gipasaka sa balay sa iyang higala ug ang mga tinugyanan sa panglawas na ang nagpahibalo nga adunay COVID-19 positive nga nakasulod sa Barangay 22-C.
Gumikan niini, gibati og tumang kadismaya si Millondaga gumikan kay luyo sa ilang gihimong pahimangno ug paningkamot, naghari diay gihapon ang kagahi sa ulo sa pipila niya ka mga constituents sama sa nahisgotang pamilya.
Awhag karon ni Millondaga ngadto sa iyang katawhan nga tabangan hinoon ang ilang barangay kontra COVID-19 bisan tuod og aminado ang nasangpit nga opisyal nga wala pa’y kasegurohan kon epektibo ba o dili ang purok o household lockdown sa pagpukan sa pandemic.
RadyoMan Joel Viray
