Puwersa sa militar ug tropa sa NPA nagka-engkwentro, usa patay

Dumingag, Zamboanga del Sur – Gumikan sa walay hunong nga operasyon sa kasundaluhan batok sa New People’s Army (NPA) subling nagkasugat ang dalan sa duha ka habig nga misangko sa engkwentrohanay didtong dapita sa Barangay Dapiwak sakop sa lungsod sa Dumingag ning probinsya sa Zamboanga del Sur.
Milungtad sa 20 minutos ang sinukliay og bala tali sa puwersa sa 53rd Infantry “Matapat” Battalion (53IB) ug sa salin nga mga miyembro sa rebelde nga ilalom sa Western Mindanao Regional Party Committee (WMRPC).
Nakalas sa giyera ang sakop sa NPA nga nailang si Nilo Runat Tambula Jr., aka Benjie/Cesar nga kanhing sakop sa nagun-ob nga Guerilla Front Big Beautiful Country sa Western Mindanao Regional Party Committee.
Nahipos gikan sa posisyon sa namatay nga rebelde ang usa ka M16 assault rifle ug uban pang personal nga gamit.
Gipaniguro ni 53IB Commanding Officer Lt. Col. Jo-ar Herrera, nga magpadayon ang ilang paglusad sa operasyon aron masiguro ang kaluwasan sa publiko.
Samtang giagda ni 102nd Infantry “Igsoon” Brigade Commander BGen. Leonel Nicolas ang nahibiling sakop sa NPA nga naa gihapon sa kabukiran nga molugsong na sa patag ug mosanong sa balaod sa gobyerno kauban ang ilang pamilya.
Nagpadayon usab ang hot pursuit operations sa otoridad aron paglakag sa nagmagahi sa yanong panawagan.