General Santos City–Dako ang pagtuo ni Police Brig. General Bernard Tambaoan, Deputy Regional Director For Administrator sa Police Regional Office 12 nga gamay nalang ang ihap sa mga New People’s Army kon NPA sa Rehiyon 12. Sa ilahang bana-bana, anaa nalang sa kapin 200 ang ihap sa mga rebeldeng grupo.
Rason niini sa kadaghan sa mga miyembro nga na-una ng misurender sa gobyerno. Pinaage matud pa sa tabang sa mga naunang nisurender, makapasaka na sila ug kaso batok sa mga nahilambigit sa managlahing krimen. Dugang pa ni Brig. Gen. Tambaoan nga dili na makahatag pa ug alarma ang presensya sa mga nahibiling NPA gumikan nagpabilin mang kontrolado ang ihap sa mga nasangpit.
Apan sila sa kapulisan ang naghimo na ug laing aksyon aron matapos na ang problema sa rebeldeng pundok kaabag ang Militar. Pinaagi matud pa sa mga kabag-uhan nga ginahimo karon sa hanay sa kapulisan ug militar, dako ang posibilidad nga sa dili madugay maangkon na ang dugay na nga handom ni Pangulong Rodrigo Duterte nga maundang na ang kalihukan sa mga rebeldeng grupo.(LVR)
