Nagdeploy ang Police Regional Office 6 kag Iloilo City Police Office sang 1,761 ka kapulisan agud mag-secure sang East Asian Seas ukon EAS Congress 2018 nga magasugod bwas nga adlaw kag magatakop sa Nobyembre 30 sa Iloilo Convention Center.
Sa send off ceremony ginpahayag ni ICPO Dir. Sr. Supt. Martin Defensor nga handa ang kapulisan agud mag-secure sang mga participants sa congress.
Pahayag ni Defensor isa ka seryoso nga bagay ang seguridad bangud magatuga ini sang indi matakos nga konsekwensya kun mapaslawan ang kapulisan.
Paathag sang opisyal indi ini dapat nga ma-compromised gani dapat nga pasobrahan lang agud makasigurado.
Sa iya bahin nagpanugyan naman si Mayor Jose Espinosa III sa kapulisan nga doblehon ang ila trabaho sa pagpasiguro sang peace and order bangud mangin focus ang syudad sang bug-os nga kalibutan subong nga semana.
Ang 6th EAS nagatuyo nga mas mapabakod pa ang implementasyon sang Sustainable Development Strategy for the Seas of East Asia ukon SDS SEA, kag makapabakod sang kolaborasyon kag partnerships sa paglambot sang local kag regional ocean conservation.
Kabahin ang Pilipinas paagi sa DENR sang Partnerships in Environmental Management for the Seas of East Asia ukon PEMSEA nga nag-organize sang conference subong nga tuig kadungan sang 25th year anniversary sang partnerships.
May 11 ka pungsod kag 22 ka non-country members sa sulod kag gwa sang East Asian regions.
May 900 ka participants nga ginalauman nga magatambong sa summit.
(Photo from web)
