PWU President Kiko Benetiz para Congressman sa 3rd District

12

E.B. Magalona, Negros Occidental – Nagpasar sang resolution ang Municipal Council sang EB Magalona para naman suportahan ang pagpapili ni Dr. Jose Francisco B. Benetiz bilang Congressman sang 3rd District sang Negros Occidental.

Si Benetiz ang utod ni incumbent Congressman Alfredo ‘Albee’ Benetiz sang 3 rd District nga sa karon ara na sa iya ulihi nga termino bilang mamalidha.

Una nga ginpakilala ni Congressman Albee si Doc Kiko sa iya mga supporters sang nagliligad pa nga mga tinuig, sa diin nakit-an man ini sa mga hilikuton sang distrito.

Suno kay E.B. Magalona Mayor Marvin Malacon, wala sang problema sa ila kon halin man gihapon sa pamilya Benetiz ng masunod nila nga representanti bangod napamatud-an naman ang performance ni Benetiz sa ila distrito, sa diin bisan personal sini nga kwarta ang ginagasto matigayon lang ang mga proyekto para sa mga pomoloyo.

Amu man ini ang nagtulod sa Municipal Council nga magpasar sang resolution nga nagasuporta kay Doc. Kiko Benetiz nga magapadayon sa naumpisahan ni Cong. Albee.

Si Doc Kiko ang sa karon nagapungko bilang Presidente sang Philippine Womens University (PWU).

Samtang, si Congressman Albee ang ginapasuni naman nga magapapili bilang gobernador sang Negros Occidental sa 2019.
Sa 2019 man, magatapos na ang termino ni Governor Alfredo ‘Freddie’ Marañon, Jr. sang United Negros Alliance (UnegA) sa diin una na nga nagpahayag si Marañon nga mas makapaayo sa probinsya kon si Benetiz ang magapungko bilang gobernador.

Si Marañon kag Benetiz ang gikan sa magkatuhay nga grupo sang nakaligad nga 2016 elections apang wala naman nagbutang sang kandidato gobernador ang kampo ni Benetiz.

Suno sa report, magapabilin naman bilang Vice-Governor si Eugenio Jose ‘Bong’ Lacson sa idalom man gihapon sang grupo ni Benetiz nga amu ang LOVE Negros.

Si former 4th District Congressman Jeffrey Ferrer, nga kaalyado ni Governor Freddie Marañon nga amu ang kasumpong ni Lacson sang 2016 election sa pagkabise-gobernador ang ginapasuni nga magabalik nalang bilang Congressman sa 4th District samtang ang iya tiayon nga si Rep. Juliet Marie Ferrer ang magabalik naman alkalde sa La Carlota City.

Si Marañon ang magaretiro na sa pulitika bangod halos natuman na sini ang iya nga handum sa probinsya paagi sa iya nga Negros First Agenda kag Negros Island Region.

Facebook Comments