Inanunsyo mismo ni Quezon City Mayor Joy Belmonte na nagpositibo siya sa COVID-19.
Sa kaniyang statement sa Facebook account ng QC Local Government Unit (LGU), sinabi ng lady mayor na kalalabas lamang ng resulta ng pinakahuli niyang COVID-19 test.
Nangyari aniya ito sa kabila ng mahigpit niyang pagsunod sa lahat ng quarantine protocols.
Pero, inaasahan na niya na madadapuan siya ng virus dahil sa kaniyang ginagawang pag-iikot sa mga ospital, health centers at Special Concern Lockdown areas.
Gayunman, maayos naman ang kaniyang kalagayan at walang nararamdamang anumang sintomas.
Sa ngayon, naka-quarantine na si Belmonte at ginagawa na ang pagtunton sa kaniyang mga nakahalubilo.
Bukod dito, isinara rin pansamantala ang kaniyang tanggapan para ma-disinfect, gayundin ang mga common area ng City Hall.
