Davao City – Nagtoo si 3rd District Councilor Petite Principe nga daghan na ang gikapoy og puyo sa ilang mga balay hatud sa kataas sa panahon nga napailawom sa nagkadaiyang klasipikasyon sa quarantine ang siyudad sa Davao nunot sa COVID-19 karong tuiga.
Busa kumbinsido si Councilor Principe nga mao kini ang rason nganong labihan nakapanikad nga makagawas kon nakagawas sa mga balay ang kadaghanan dihang mas gipaluagan ang quarantine sukad niadtong miagi nga bulan hangtud karon.
Apan nagdumili si Councilor Principe sa paghatag sa iyang panapos nga pamahayag nga kon ang rason ba sa pagsaka sa kaso sa COVID-19 sa nasud partikular sa dakbayan bunga ba kadto sa quarantine fatigue ug naghingabin nga kumpiyansa sa katawhan kon sa publiko.
Hinoon usa sa mga nakita sa Konsehala nga hinungdan sa padayon nga pagsaka sa kaso sa mga tawong natakdan mao ang pag-uli sa gatusan ka Locally Stranded Individual kun LSIs ug sa returning OFWs dinhi sa dakbayan ug ubang bahin sa rehiyon XI.
“Siguro noh sa kadugay sa panahon nga makabati ta’g mura ta’g kagawason na gyod sa atong mga panimalay. So ang ako lang nga while we want to go back to what was normal sa kadtong unang panahon dili ta angay nga magkumpiyansa kay hangtud karon naa gihapon ang COVID pero musunod lang gyod ta sa mando sa IATF, mando sa atong gobyerno na kadtong mga dili puwede mugawas, kadtong mga health protocols ato gyod sundon,” segun ni Councilor Principe.
Nagpaambit na lamang og tambag ang Konsehala sa mga dabawenyo nga dili magkumpiyansa ug sigurohon na lang nga hitsas sa kagamitang pangdepensa sama sa facemask, face shield, ug hand sanitizer batok sa pandemic virus dihang mugawas sa balay aron manarbaho o dili ba kaha magsuroy-suroy.
RadyoMaN Joel Viray
