Adunay tulo (3) ka bag-ong positibo nga kaso sa COVID-19 sa mga Locally Stranded Individual (LSI) nga mouli unta sa Quezon, Bukidnon.
Kini ang gibutyag sa LGU-Quezon sa ilang opisyal nga pamahayag nga gipagawas kagahapon, Agosto 4, 2020.
Matud pa sa ilang statement nga sa kasamtangan gi-isolate ang tulo sa Northern Mindanao Wellness and Rehabilitation Center (NMWRC) sa Malaybalay City.
Ang usa niini usa ka 36 anyos nga lalake nga taga Brgy. Libertad, nanarbaho isip usa ka pipe fitter sa Laguna. Kaniadtong Hulyo 30, 2020, 7:00 AM, miabot kini sa Laguindingan Airport pinaagi sa Cebu Pacific Flight 5J375. Miabot usab kini sa NMWRC pagka 9:00 PM human kini gihatod sa sakyanan sa munisipyo.
Nagpositibo kini sa Rapid Test for Antibodies, hinungdan nga gipabilin kini sa NMWRC ug gipaagi sa RT-PCR test sunod adlaw. Migawas ang opisyal nga resulta nga positibo sa COVID-19 pagka Agosto 3, 2020.
Nagpositibo usab sa COVID-19 usa ka 19 anyos nga lalake nga taga San Jose, Quezon, Bukidnon, nga nanarbaho isip waiter sa Laguna; ug usa ka 49 anyos nga lalake nga taga Butong, Quezon, Bukidnon, nanginabuhi isip pipe fitter sa Batangas City.
Kini sila miabot sa Laguindingan pinaagi sa Cebu Pacific Flight 5J379 pagka Agosto 1, 2020, 11:00 AM, ug gihatod sa Malaybalay sa sakyanan sa munisipyo pagka udto. Nagpositibo sila sa Rapid Test for Antibodies, busa gipaagi usab sila sa RT-PCR test. Karong adlaw, migawas ang opisyal nga resulta nga nag-positibo sila sa COVID-19.
Sukad sa pag-abot sa tulo ka pasyente sa Malaybalay, wala na kini gipabiyahe.
Padayon sila nga gi-isolate sa NMWRC. Nakasinati lamang og ubo ang pasyente nga taga Butong, samtang walay nasinati nga sintomas ang duha.
Gi-isolate usab ang walo (8) ka pasahero nga nakahimamat sa maong mga pasyente sa pagbiyahe.
Padayon ang contact tracing sa uban pang posible nga nakahimamat sa maong mga LSI.
Pabilin nga andam ang lokal nga panggamhanan sa Quezon, Bukidnon sa pagbatok sa COVID-19.
Gi-awhag ang tanan nga kanunay batunan ang mga lakang isip paglikay sa COVID-19: PALAYO, TABON, HUGAS, ug HINLO aron magpabilin nga himsog ug luwas sa sakit.
