Davao City – Walay gibasol nga bisan kinsa ang pamilya sa mga biktima sa fatal road crash nga nahitabo sa Quimpo Boulevard, Davao City niadtong Mayo 31.
Sa eksklusibong interbyu sa RMN Davao sa uyuan sa mga namatay nga si Dante Simangan nga usa ka disgrasya gayod ang nahitabo ug walay angay basulon sa insidente.
Aron maghatag og katin-awan ug tubag sa ilahang mga pangutana segundo una pa man nahitabo ang aksidente gipaanalisar ni Simangan ngadto sa forensics ang nakuhang footage sa dashcam sa bus.
“Kami mismo naay mga espekulasyon nga kusog ang dagan apan sa analysis sa forensic, ingon siya overshoot ang nahitabo unya swerving kay kalit kaayo dili gyod siya counterflow per se nga layo pa nagcounterflow na ang sakyanan kay seconds lang ang nahitabo,” sumala niini.
Gibutyag niini nga base sa opisyal nga report negatibo ang tanan sa alcohol lakip na ang bus driver.
“Wala namo gibasol ang driver apan dili pod nato basulon ang duha tawon ka mga babaye. Wala silay sala, wala gyod to tuyua” segun ni Simangan.
Matud ni Simangan wala sila nagpasang-at og kaso ngadto sa driver sa bus.
“Wala gyod mi nag-file og kaso, wala gani nagpakita nga naa miy kasuko, wala gyod intawon kay maluoy pod ta sa driver,” sumala niini.
Andam usab si Simangan nga mahimamat ang bus driver ug gipaabot niini ang iyahang mensahe nga wala nasuko ang ilahang pamilya ngadto kaniya.
RadyoMaN Aimee Guinita
