Marawi City- Dala ang mga placards nga dunay gisulat nga “Peace, Not War”, temporaryo’ng gi-suspende sa tagdumala sa Masiricampo Abantas Memorial Islamic and Science Academy (MAMISA) ang ilang klase niadtong nakalabay’ng adlaw.
Dala ang ilang mga senior high school students ngadto sa Jamiatu Muslim Mindanao Quadrangle sa Barangay Matampay, sa Marawi City, misalmot sa peace rally ang maong tunghaan, aron ipanawagan ang pagpasa sa Bangsamoro Basic Law (BBL) nga version sa Bangsamoro Transition Commission’s (BTC).
Matud pa sa magtutudlo nga si Johannah Maundah, ilang gi-ampo nga ang final draft sa BBL nga ipasa sa Bicameral Conference Committe aron pirmahan ni Presidente Rodrigo Duterte mao kadtong naa sa Comprehensive Agreement on the Bangsamoro o CAB.
Gipahigayon sa nagkadaiyang mga civil society organizations sa Marawi City ug Lanao del Sur ang maong peace rally sa dili pa ang panagtagbo sa Bicameral Conference Committee sa Hulyo 9 ngadto sa 13, aron himoon na ang final draft sa BBL.
Matud pa ni Drieza Lininding sa Ranao Confederation for Peace, nga bisan paman sa ilang nagpadayung paningkamot nga makabangon pag-usab, human ang lima ka bulan nga giyera sa Marawi City, kinahanglan pa gihapon nilang ipagawas ang ilang mga tingog – pagsuporta sa BBL.
Ang isyu, matud pa, sa BBL ug sa Marawi City, dili mahimong ibulag tungod kay ang BBL maoy hinungdan sa pagkaguba sa Marawi. (Divina M. Suson)
