BACOLOD CITY – Desidido nga pasakaan sang kaso ni Councilor Dindo Ramos si Councilor Kalaw Puentevella nga nagsumbag sa iya samtang yara sa sesyon ang Sangguniang Panlungsod kagapon.
Sa interview sa mga katapo sang media, ginsiling ni Ramos nga na-agrabyado siya sa ginhimo sa iya ni Puentevella.
Dugang pa niya nga wala niya gid ginalauman nga nga patup-an siya ni Puentevella matapos ang ila mainit nga diskusyon sa isa ka agendum sa session. Suno kay Ramos, daku ang respeto sini sa kapwa konsehal.
Nahibalu-an nga nagsugod ang mainit nga diskusyon sang duha sang mamangkot si Puentevella kun san-o nakuha ni Ramos ang kopya sang kontrata sa tunga sang ciudad kag sang IPM Construction and Development Corporation nga magapatindog sang cell number 2 sang sanitary landfill sa Barangay Felisa bangud puno na ang cell number 1.
Pagadiskusyonan kun tani sa sesyon ang paghatag sang authority to sign kay Bacolod City Mayor Evelio Leonardia.
Ginareklamo partikular ni Puentevella ang ulihi nga paghatag sa ila sang dokumento rason nga wala pa ini nila natun-an.
Bangud sini, nangin mainit ang sabtanay sang duha ka konsehal asta nga nag-recess ang sesyon pero nagpadulong ang mga ini sa aisle sang session hall asta nga ginsumbag ni Puentevella si Ramos. Gilayon naman sila nga ginseparar sang iban pa gid nga mga konsehal.
Diri na sang nagmosyon si majority floor leader Councilor Ceasar Distrito nga i-expel si Puentevella sa sesyon nga gilayon naman gin-aprubahan sang mayoriya.
Bangud sa insidente, nagsaka naman sa 220/92 ang blood pressure ni Ramos. -RCSG/iFM Bacolod
