Manila, Philippines – Naglagak na ng P100,000 piyansa si Rappler Ceo at Executive Editor Maria Ressa kaugnay ng kaso nitong cyber-libel.
Si Ressa ay nagpalipas ng magdamag sa opisina ng NBI matapos arestuhin kahapon sa bisa ng warrant of arrest na inilabas ng Manila RTC branch 46.
Nag-ugat ang kaso sa isang artikulo ng Rappler noong 2012 kung saan sinisiraan umano ang negosyanteng si Wilfredo Keng.
Ayon kay Ressa, ito na ang ika-anim na beses na nagpiyansa siya sa loob lang ng dalawang buwan at ang unang beses na siya ay naaresto.
Giit niya, hindi pa naisasabatas ang cyber-libel noong nalathala ang artikulo kaya hindi ito dapat sakop ng batas.
Para kay Ressa – ang pag-aresto sa kanya ay malinaw na pag-abuso ng kapangyarihan at paggamit ng batas laban sa mamamayan.
Kasabay nito, nagpasaring din si Ressa kay DOJ Secretary Menardo Guevarra at iginiit na may karapatan siyang papanagutin ang kalihim.
