Davao City – Tungod sa ginahulat nga Unconditional Cash Transfer Program, nadelatar karon ang pag-release sa regular nga payout ngadto sa Pantawid Pamilyang Pilipino Program kun 4Ps beneficiaries.
Sa pakighinabi kang DSWD information officer Flora Mae Espada atol sa tulumanong Kolokabildo sa Radyo sa DXDC RMN Davao, gibutyag niini nga dili lang ang mga beneficiaries sa Davao City ang nakasinati niini apan lakip na ang tibuok region XI ug sa national level.
Gipasabot ni Espada nga adunay ginapaabot sa Unconditional Cash Transfer Program diin sumala pa mao kini ang programa nga gipirmahan ni Presidente Rodrigo Duterte sa milabayng tuig.
Sa nasangpit nga programa, hatagan og 200 pesos per month ang mga benepisyaryo apan isa lang kini ka hatagan diin sa dose ka bulan, makadawat sila og dugang 2,400 pesos ug idungan kini pag-release sa regular payout sa Conditional Cash Transfer Program.
Matud ni Espada, gitawag nga unconditional cash transfer ang maong programa tungod wala kini kondisyon ug hatagan lang og dugang kinatibuk-an nga 2,400 pesos ang mga benepisyaryo sa 4Ps ug social pensioners sa DSWD kinsa direktang apektado sa Tax Reform for Acceleration and Inclusion (TRAIN) law.
Lauman nga sa ulahing semana sa Abril o sa bulan sa Mayo mahatag ang regular pay-out dugang ang 2,400 pesos sa Unconditional Cash Transfer.
RadyoMaN Renz Barbarona
