TACLOBAN CITY – Ginpapa-alerto han Regional Disaster Risk Reduction Management Council (RDRRMC) an ngatanan nga Local Government Units (LGUs) para ha posible nga pagbaha ngan landslide duroy han bagyong Amang ha Sinirangan Bisayas.
Ginpapa-activate ni Office of Civil Defense Regional Director Henry Anthony Torres an emergency operations center han kada bungto; magdumara hin pre-emptive evacuation ha mga barangay nga delikado ha pagbaha ngan landslide; ngan mag-abiso ha mga mangirisda nga diri na managat pa.
Sumala naman kan Arvin Monge, provincial head han Leyte’s disaster risk reduction management office, naka-standby para mamonitor an mga lugar nga babahaon o posible magkamayada hin landslide.
Ha Tacloban City naman, andam na an local rescue unit ha kun ano it mananabo dara han bagyong Amang.
Sumala han PAGASA, makikit-an buwas an mata han bagyo ha Barugo, Leyte sanglit hi Mayor Ma. Rosario Avestruz in nagpa-deploy na hin emwrgency team ha ira bungto, apil na dinhi an mga kapulisan ngan bombero nga mabisita ha kada barangay ha posible nga pagbaha ngan landslide.
Ha Calbayog City, Samar nga diri pala maiha nga ginlasurbo han bagyong Usman, in naka-alerto na gihapon.
Gin-abisuhan na an barangay Cag-anahaw han mao nga syudad nga mag-evacuate na tungod han hulga han baha sugad han nanabo han nakalabay nga bagyo.
Unom an nareport nga namatay ngan duha an missing ha Calbayog City, Samar durot han Usman.
