Ning hinapos sa Septyembre na-imbitar ko sa usa ka community college sa may habagatang bahin sa Sugbo isip ilang resource speaker. Sa usa ka lungsod nga nabantog tungod sa simbahan niini nga suma pa milagroso daw. Apan niining atoang #realtalk dili ang sikat nga simbahan ang atoang hisgotan kun dili ang kakuwang sa facility sa eskwelahan nga akoang naadtoan.
Mihatag ko og talk ug mini-workshop kabahin sa theater or stage performance alang sa mga estudyante sa maong community college. Isip preparasyon ni nila sa ilang finals alang sa Humanities nga subject. Suma pa sa maestra nga maoy ga-imbitar naku nga akoa pong schoolmate pag-college ug kauban sa theater group kaniadto nga nagkuwang gyud kuno og facilities ang maong eskwelahan.
Gamay ra ang classrooms ug gamay pud gyud ang area sa matag classroom. Naay hapit mo usa ka libo nga estudyante ang maong community college sa pagkakaron kung asa nag-offer ni og 4 courses. Naa poy kapin 20 ka members sa faculty sa pagkakaron. Funded by the local government daw ni ug suma pa gane niya nga dili gyud kuno competitive ang sweldo nilang mga magtutudlo.
Apan malipay nalang siya kay daghan intawn nga mga lumad sa ilang lungsod nga galisud pud ang makahuman og college tungod sa maong eskwelahan. Barato kaayo ang tuition fee kay 90 pesos ra matag unit.
Hinaot pa nga molambo pa og samot ang maong eskwelahan ug mapun-an unta ilang mga classrooms para wala nay magklase ilawom sa punoan sa mga dagkong acasia ug mahoganny sa ilang eskwelahan.
