Davao City – Gibasol sa Mindanao Peace Council (MPC) ang mga pulitiko kung nganong pabilin nga nibarog ang CPP-NPA-NDFP kinsa dayag nga walay hunong sa pagsabwag og kasamok sa tibuok Pilipinas.
Gitusilok ni MPC Convenor ug Peace Advocate Hope Fernandez ang mga pulitiko kung nganong hangtud karon, wala pa gihapon mapuhag ug matuldokan ang insurhensiya dinhi sa nasud.
Sumala ni Fernandez, kung wala pa lang unta misuporta sa hilum ang mga politiko nahatagan na unta og hustisya ang mga namatay ug dili unta malisdan ang militar ug kapulisan sa pagpildi sa rebeldeng organisasyon.
Ang pagpaluyo sa mga politiko sa kalaban sa estado makunsidera kini nga ‘treason’ kun pag-traydor kun paglu-ib sa katawhang Pilipino ug sa kagamhanan sa nasud nga ilang gisilbihan ug gipanumpaan nga ilang tim-os nga alagaran.
Nakalas ang daghang kinabuhi sa mga inosente ug napugos og sirado ang mga kumpanya nga nagresulta sa pagwagtang sa daghang trabaho gumikan sa pagkamaluibon sa mga politikong nibayad ngadto sa mga rebelde sama sa kwartang ilang ginatunol ngadto sa maong hut-ong panahon sa kampanya.
Giduyogan ni Fernandez ang panganti sa Department of Interior and Local Government (DILG) nga isa-publiko ang pangalan sa mga politiko ug mga kandidato nga gabayaran ngadto sa mga kaatbang sa gobyerno.
Dili lang diskwalipikasyon ang angay ikaso ngadto kanila kon dili lakip na usab ang treason aron sa ingon wala nay kaugmaong maguba pa ug aron maluwas ang mga kabatan-onan gikan sa impluwensiya sa kriminal ug nilu-og nga binuhatan sa maong hut-ong.
RadyoMaN Joel Viray
