General Santos City–Mas gipahugtan matud pa karon sa Philippine National Police ang ilahang recruitment alang sa mga bag-ong mga pulis aron masiguro nga duna gayo’y kapasidad nga moserbisyo sa nasud ang makapasa niini.
Mao kini ang nahimong pamahayag ni Police Major General Daniel Macaltang Jr. ang labaw sa Directorate Integrated Police Operation Western Mindanao.
Sumala pa sa opisyal nga sa karon ginasigurado nila nga aduna gayo’y kapasidad nga mamahimong pulis ang ilahang mga recruits ug takus nga mosul-ob ug uniporme sa pulis.
Pinaagi matud pa sa pagbutang ug barcode sa mga papeles sa mga recruits dili na magsibli ang palakasan system ug ang binayranay aron nga maka sulod lang sa organisasyoin tungod kay wala nasaoud ang mga naga proseso sa mga papeles sa mga pangalan sa recruits tungod bugtong barcode lang ang ilang makit-an.
Bisan matud pa ug mobayad ang usa ka recruit wala gihapoy kasiguruan nga maka sulod kini hilabi na ug wala kini mipasar sa mga proseso nga pagabuhataon ug posibleng masayang lang ang kwarta sa nashisgutan.
Samtang wala man usay namonitor ang PRO 12 nga binayranay sa mga bag-ong pulis nga ilahang narecruit.
Sumala pa ni Police Brigadier General Eleseo Rasco ang Regional Director sa PRO-12 nga iyaha na matud pang gipahimangnuan ang iyahang mga sakop nga dili gayud mangayo ug lagay sa mga recruits aron lang nga makasulod sila sa pagkapulis tungod kay ug ingon ani matud pa ang pamaagi nganong nakasulod ang usa ka recruit sigurado kini nga bawion gayud niya kini oras nga anaa na siya sa serbisyo.
Dinhi matud pa magsugod ang kurapsyon sa ilahang han-ay hinungdan nga ilaha kining hugot nga ginamonitor ug kung aduna may masakpan nga maghimo niini, gipaniguro ni Rasco nga mag-atubang gyud ug silot.
Samtang ang usa matud pa ka pulis nga na-entrap tungod sa pag pangayo ug kwarta sa usa ka recruit ang nag-atubang na ug kaso karong mga panahona ug ang korte na ang makadisisyon niini. (Dave Silagan)
