Referee, comatose matapos ginsumbag sang tatay sang basketball player

33

TIGBAUAN, Iloilo – Comatose ang referee sa basketball matapos ginsumbag sang amay sang isa ka basketball player sa Parara Norte, Tigbauan, Iloilo. Natabo ang insidente sang Mayo 11, alas 8 sa gab-i kadungan sang Liga sa Tigbauan. Ang biktima ginkilala kay Hector Eguico, isa ka retired teacher kag residente sang Brgy. 4 Igbaras, Iloilo. Suno kay PSInsp Hermogenes Eulatic sang Tigbauan PNP, gintawgan sang foul ni referee Eguico ang isa ka player apang nagreact ang amay sini nga nagalantaw man sa hampang. Wala makapangaman ang referee, gulpi lang nagsulod sa court ang amay sang player kag ginsumbag ang referee. Naigo ang ulo sang biktima sa bato kag gindala sa Guimbal District Hospital apang ginrefer ini sa Iloilo Doctor’s Hospital. Suno kay PSInsp Eulatic, nakainom ang suspek sang nahimo ang insidente. Nagpalagyo ini matapos mahimo ang krimen apang natigayon man nga madakpan paagi sa jot pursuit operation snag Tigbauan PNP. Tuman naman ang paghinulsol sang amay sang namarasmasan sa iya nahimo. Nahunong na ini karun sa karsel sang Tigbauan PNP kag napasakaan na sang kaso nga serious physical injuries.

Facebook Comments