General Santos City—samdan ang usa ka construction worker human kining gidunggab sa myembro sa Children in Conflict With The Law (CICL) o mas nailhan sa tawag nga “BATANG SUKARAP” sa may Crossing Makar, sakop sa Barangay Labangal Gensan.
Ang biktima nailhang si Jerson Adol, 19, residenti sa Barangay Tuyan, Malapatan, Sarangani Province.
Alas 2:00 ang takna sa kaadlawon kagahapong adlawa, Dominggo, May 14, 2017 dihang nag inum ang biktima uban sa iyang ig-agaw nga si Michael Tolo ug uban pa nilang kaubanan sa trabaho sa usa ka Video-k bar sa may Crossing Makar atubangan sa usa ka tunghaan sa Kolehiyo.
Human ug inum, sila midesisyon nga muuli sa ilang gipuy-an apan pag gawas nila sa maong establishemento, sila giatngan sa grupo sa mga “BATANG SUKARAP” nga gibana-banaang anaa sa 20 ang ihap.
Gitabangan ug kulata ang biktima ug mga kaubanan niini. usa sa mga suspek ang mibunlot ug hait nga hinganiban ug gidunggab sa biktima igo sa iyang bukton nga bahin ug uban pang parti sa lawas.
Paspas dayon nanibat sa wala sayring lugar ang mga suspek. Samtang ang biktima gidala dayon sa Dr. Jorge Royeca Hospital. Sa karon padayon ang gihimong imbistigasyon sa kapulisan sakop sa Makar Police Station kalabutan sa insidenti.
