Davao City – Dako og tabang ang pagpatuman sa regional border control checkpoint ilabi na karon nga taas ang natalang kaso sa Coronavirus Disease 2019 (COVID-19) sa syudad sa Davao.
Matud ni Davao City Mayor Sara Duterte-Carpio nga dili dali wagtangon ang regional checkpoint sa rason nga makontrola ang lihok sa tawo ilabi na sa mga non-essential travelers pasulod sa Davao region.
“Kung makita nato, increasing man ang (COVID-19) cases, so dili na anytime soon ma-lift (ang regional border control),” sulti sa mayor.
Gitataw sa alkalde, ang desisyon anaa sa Regional Inter-Agency Task Force For The Management Of Emerging Infectious Diseases – Regional Task Force Against COVID-19 (RIATF-RTF)-XI nga maoy nagpagawas sa regional border checkpoint guidelines.
Niadtong Domingo (Mayo 16, 2021) sa datos sa Davao City Police Office (DCPO), anaa sa 150 ka indibidwal ang wala nakasulod sa regional border checkpoint sa Lumondao, Marilog District tungod kay walay importanteng transaksyon pasulod sa rehiyon ug napakyas pagpresenta og negatibong resulta sa RT-PCR (reverse transcription polymerase chain reaction) test isip mandatory requirement alang niini.
RadyoMaN Kirby Manzon
