Gibuksan kagahapong adlawa ang Regional Integrated Competition kon RIC sa lungsod sa Pagadian, Zamboanga del Sur, Disyembre 10, 2017.
Ang Regional Integrated Competition o mas giilang Regional Meet mao ang panaghiusa sa ZPRAA kon, Zamboanga Peninsula Regional Athletic Association, RSPC kon, Regional Schools Press Conference ug RFT kon Regional Festival of Talents nga tulo ka mga dagkong kompetisyon sa rehiyon.
Mahinunduman nga kani-adtong Pebrero lang ning kasamtangang tuig nagpahigayon usab ug Regional Meet diin nahimong usa sa mga host ang Dakbayan sa Dipolog.
Matud ni Region IX Regional Sports Officer Doctor Eugene Penales nga unang higayon nga duha ka beses nag pahigayon ug Regional Meet karong tuiga, kini sumala ni Region IX DepEd Regional Director Doctor Bores aron tagaan ug taas nga higayon ang mga mananaog sa pagprepara alang na usab sa umaabot na Palarong Pambansa 2018 sa Dakbayan sa Vigan.
Dugang pa ni Penales nga ang hamubong preparasyon sa mga representative sa Region IX mao ang hinungdan sa pag-ubos sa ranking sa Region IX sa nilabay nga Palarong Pambansa.
Dungan sa pagsugod sa ZPRAA kagahapong adlawa gisugdan usab ang Regional Schools Press Conference, kay sumala pa ni Penales nga gusto Region IX DepEd Director Bores nga dili lang puros ball games ang mahitabo sa Regional Meet maong gidungan ang Schools Press Conference ug Festival of Talents maong nahimo kining Regional Integrated Competition.| Jessica “Ikang” Jarlego
