Sarangani Province–Malampuson nga natigayon bag-uhay lang sa probinsya sa Sarangani ang unilateral training exercise sa Philippine Navy, Philippine Marines og mga reservist gitawag nga Exercise Pagsasama 2018.
Sulod sa unom (6) ka tuig, karon pang tuiga nakabalik ang maong aktibidad sa Sarangani Province og General Santos City. Ang Philippine Marines ang maoy naval infantry force sa Philippine Navy.
Nahimong bibo ang kadagatan sa Barangay Tuyan, Malapatan Sarangani Province human nga gipili sa Philippine Navy nga sa Tuyan ang lokasyon sa ilang floating and air assets training exercise kauban ang 300 kabuok mga active member og reservists.
Ang mga reservist ang naggikan pa sa upat (4) ka rehiyon sa Mindanao nga mao ang Regions 10, 11, 12 og 13 Caraga Region. Kasagaran kanila mga professional, aduna pay mga babae nga nangapil, may mga tutor og negosyanteng reservist gikan sa Cagayan de Oro, Gensan og ubang parte sa Eastern Mindanao.
Nitambong mismo sa maong pagbansay ang labaw sa Naval Forces Eastern Mindanao Command naka-basi sa Panacan, Davao City nga si Commodore Ramil Enriquez. Anaa pud sa area si Sarangani Governor Steve Chiongbian Solon nga ang ranggo niini sa Philippine Marine Reservist usa ka lieutenant colonel. Kauban sa gobernador ang inila nga negosyante sa panagatan sa Gensan nga si Mr. Marfin Tan nga maoy nangulo usab sa mga reservist sa Philippine Navy may ranggo nga commodore.
Gi-disenyo ang maong mga pagbansay hilabi na alang sa mga reservist aron i-prepara sila kung adunay mga kagubot, katalagman og kalamidad. Sila matud pa mga force multiplier og volunteer aron ayudahan ang regular troop panahon sa emergency og disaster response.
