Reklamo sa seniors sa ilang discount benefits, giaksyonan sa OSCA

Davao City – Gipaniguro sa Office of the Senior Citizen (OSCA) sa Davao City nga maaksyonan gilayon ang mga reklamo sa senior citizens kalabot sa benepisyo nga ilang madawat, subay sa balaod.

Sa interview sa DXDC RMN Davao kang Pastor Luis Moran, OSCA head, iyang gibutyag nga ubay-ubay na usab ka mga reklamo ang gipaabot kanila, diin aduna gayoy mga establisemento nga wala nagapatuman sa discount benefits alang sa mga senior citizen.

Gibutyag ni Moran nga adunay usa ka establisemento nga kapila na napatawag tungod sa paglapas sa balaod ug nakig-settle ra usab sa nagreklamong senior. Dugang niya, ilaha usab nga ginapahimangnoan ang establisemento ugaling sila gireklamo ug kung sila mapamatud-ang nakalapas, sila gayud mag-atubang og kaso.

“Pag naay magreklamo, amoa gyud na silang pangitaan. Ipa-surveillance dayon namo. Padal-an og sulat kinsa ang tag-iya kay dili man pud pwede na to nga okay-okay lang. Daghan na’g complaints so far, dili lang sa 20% discount sa mga restaurant or pharmacy,” sulti ni Moran.

Alang sa dugang impormasyon ug pagpaabot sa ilang mga complaints, mamahimong bisitahon ang mga satellite office sa OSCA sa Buhangin, Bunawan, Tugbok, Matina Crossing, Magallanes o sa City Social Welfare and Development Office (CSWDO), ug sa Toril asa nahimutang ang ilahang main office.

RadyoMaN Kirby Manzon