Nagalab-ot sa masobra P1 million ang kantidad sang mga nagapanguna nga kinahanglanon ang ginpadala sang Police Regional Office 12 sa mga ginsalakay sang mga bagyo nga Rolly kag Ulysses sa Bicol Region.
Suno kay PRO 12 Regional Director Brigadier General Michael John Dubria, nagserbi naman nga escort sa apat ka mga truck nga ginkomisyon sang PNP 12 ang pipila ka mga police personnel.
Karga sang mga truck ang bugas, noodles,canned goods, face masks, face shields, used clothing, bulong, bottled water, powdered milk, kag mga repacked food items..
Dugang pa ni Dubria nga nagalab-ot man sa P1 million ang kantidad sang contruction materials ang ihatag sang PNP 12 sa mga apektado nga mga pumuluyo nga nawad-an sang balay tungod sa bagyo.
Suno kay Dubria ang police team nga nag-escort sa mga essential supply ang isa ka bulan nga magapabilin sa Bicol para magbulig sa relief operations.
Pahayag pa niya nga nagdesisyon sila nga maghatag kon ano ang makaya matapos makita ang danyos sang magkasunod nga bagyo sa mga pumuluyo sang Bicol.
Ginpasalamatan man sang police official ang mga PNP personnel kag indibidwal nga naghatag sang donasyon para sa nasambit nga relief operation sang PNP 12 sa mga naapektuhan sang bagyo.
