Giklaro sa Department of Social Welfare and Development kon DSWD Region 10 ang kalabot sa mga nadawat nga text sa publiko gikan sa NTC kalabot sa ReliefAgad app.
Sa interview sa RMN Malaybalay gibutyag ni Charmaine Tadlas ang information officer sa DSWD Region 10 nga ang web application nga “ReliefAgad” ga-proseso sa cash assistance ilawom sa Social Amelioration Program, para lang sa mga dapit nga gipailawom sa Enhanced Community Quarantine kon ECQ.
Nagpasabot kini nga walay labot ang mga reisdente sa Northern Mindanao kon Region 10 tungod kay anaa man sa Modified General Community Quarantine ang tibook Northern Mindanao.
Matud ni Tadlas nga tungod kay text brigade ang gihimo sa NTC maong nakadawat sa maong mensahe bisan ug wala kini sa ECQ areas.
Gipahayag usab sa DSWD nga kadtong mga naka-fill-up na sa mao nga application, wala kini tulubagon. Apan giklaro niya nga mapunta lang sa data bank ang mao nga impormasyon ug wala kini nagpasabot nga kung naka-fill up na aduna nay madawat nga ayuda.
