Davao City – Gitay-og karon ang imahe sa Tagum City gumikan sa sunod-sunod nga pagpamusil-patay sa gituhoang mga nahilambigit sa napalpak nga mga investment schemes.
Matud ni Tagum City Mayor Allan Rellon, subay sa ilang talaan mukabat na sa napulo ka tawo ang gipamusil-patay sa iyang lugar sukad naundang ang operasyon sa mga iskema kapin duha ka bulan na ang nakalabay.
Ang ulahing gipatay mao ang anak sa agent sa PCL investment nga mao si Judylou Palas, 22 anyos, maestra ug nag-estar sa balay sa iyaan niini sa Purok Dahlia, Visayan Village,Tagum City.
Gisipa sa armado ang pultahan sa balay ug pagsulod, deretso nang giluthang ang dalaga hangtud namatay ug samdan usab ang 15 anyos nga manghud niini nga si Jane kinsa gitambalan na karon sa ospital.
Hugot gikondena ni Rellon ang kamatayon sa dalagang biktima kinsa nabulit og igo-pinusilan ang tibuok lawas niini timaan sa sobra ka kasuko sa mi-atakeng suspetsado.
Apan giingon sa mayor nga ang mga nahitabong ngilngig nga krimen makunsidera gihapon nga ‘isolated cases’ sanglit kontrolado pa man ang kinatibuk-ang sitwasyon sa ilang syudad.
Giangkon ni Rellon nga ang niluog nga binuhatan sa mga kriminal namagan sa mga ahente ug kadtong walay direktang kalambigitan sa investment schemes.
Apan gitino ni Rellon nga dili tanang nahitabong patay makonekta sa investment schemes tungod kay ang pipila niini nga motibo posible ang personal grudges sama sa nahitabo sa tomboy ug babaye nga patay sa Apokon.
Hangyo sa mayor ngadto sa iyang katawhan nga dili kumkumon ang balaud og pasagdan ang korte nga maoy molutos ug musilot sa mga opisyales sa mga investment companies nga misibat sa ilang kwarta.
Matud ni Rellon, andam mo-aksyon ang lokal nga kagamhanan sa mulo ug pagtabang sa mga investors aron mabalik ang ilang kwarta ug gani tulo na ka kaso ang nasang-at batok sa mga anaa sa likod sa iskema.
Subay ani, andam muhatag og reward ang lokal nga kagamhanan sa mga tawo nga makahatag og inpormasyon ug makatudlo sa gikahimutangan sa mga kriminal aron makasuhan ug mapreso.
Gipasalig sa mayor nga nagpabiling luwas ang iyang katawhan ug ang mga dumuduong sanglit mas gipahugtan pa sa mga awtoridad ang seguridad sa entrance ug exit points sa Tagum City.
Gimandaran na usab niini ang Tagum City Police Office sa pagmontar og mga chokepoints ug pag-deploy og mga mobile patrols sa mga lugar nga posibleng agian ug sibatanan sa mga armadong naka motor.
Aminado si Rellon nga dakung hagit karon kaniya kung unsaon pag-angkon pag-usab sa ‘zero crime incidence’ nga natilawan sa syudad sa kasagsagan sa operasyon sa maong mga iskema.
RadyoMaN Joel Viray
