General Santos City—Dili tinuod nga adunay babaye nga gikan sa Tagum City nga niabot sa barangay Calumpang nga positibo sa COVID-19, kini ang gikumperma ni Calumpang, Barangay Kapitan Arthur Ryan Dupalco.
Nasayran nga nakamugna ug kahadlok sa mga taga Barangay Calumpang ang post sa usa ka netizen sa Social Media nga matud pa adunay babaye nga gikan sa Tagum City nga positibo sa Covid-19 nga miabot sa maong Barangay.
Sa pakighinabi sa RMN Gensan News Team ngadto kang Kapitan Dupalco iyang gipaklaro nga ang gikaingong babaye sa Social Media dili gikan sa Tagum kon dili gikan kini sa Cotabato City ug dugay na kining niabot sa Gensan partikular na sa iyang balay sa barangay Tambler.
Igo ra kining nibisita sa iyang anak nga taga barangay Calumpang ug dili tinuod nga positibo kini sa Covid-19.
Dugang pa sa kapitan nga nahidangat na sa ilang buhatan ang nagpost sa Social Media bahin sa fake News ug nangayo na ug dispensa gumikan sa sayop nga impormasyon nga nakamugna ug kahadlok sa mga residente.
Dungan niini nagpahimangno si Dupalco sa katawhan sa iyang Barangay nga dili magpataka ug post sa social media ug dili motuo sa mga sayop nga balita hilabi na kalabutan sa Covid-19 tungod makahatag ra kini ug kabalaka sa katawhan.
Dapat ang mga balita nga tuohan kadtong gikan sa mga ahensya sa gobyerno nga nagatutok kalabutan sa Covid-19.
