RESOLUSYON TAGPASAR NAN CRISIS MANAGEMENT COMMITTEE SA PAGHANGYO SA OPAPP PARA SA PAGPATUMAN NAN SUMO SA SURIGAO DEL NORTE
Human tagpaabot an hangyo nan pamilya sa duha ka tagdagit na pulis na sila ni P02 John Paul Doverte ug P02 Alfredo Degamon Jr. na unta ipatuman an Suspension of Military and Police Operations sa Surigao del Norte para luwas na mabuhian an mga ini gikan sa kamot nan New People’s Army, isa ka resolusyon an tagpasar nan Municipal ug Prov’l Crisis Management Committee para hangyuon an Office of the Presidential Adviser on Peace Process o OPAPP na manginlabot na.
Sa tigom sa Crisis Management Committee, tag-angkon nan PNP Prov’l Director Senior Supt. Antony Maghari ug 30th Infantry Batallion Commander Lt. Col. Allen Tomas na waya sa ila an gahum para sa pagpatuman sa SUMO o SUPO kundili sa ila tag-as pa na opisyal sa nasyunal. Bisan kon gusto pa nila na tagaan nan pagtagad an hangyo sa pamilya sa duha ka pulis, may ila tagsa-tagsa ka mandato na kinahanglan sundon. Hinoon kon imando sa taas, andam sila na motuman.
Namahayag si Atty. Premolito Plaza, an Spokesman nan Prov’l Crisis Committee na ila tagpaagi sa OPAPP an amo na hangyo sa implementasyon sa SUMO ug SUPO labi na kay ini an may mandato sa peace concerns lakip na sa nasyunal na lebel na nila ini tagpaagi. Dugang pa niini, sa pagsugod sa pagkadagit sa ila ni P02 Degamon ug P02 Doverte, si Gov. Sol Matugas an nakigkita na isab kan Sec. Jesus Dureza sa OPAPP para sa paghangyo sa pagtabang sa pagresolbar sa sitwasyon sa krisis.
