RESULTA SA NAPASAGDAN NA NILUTO, ISA KA PANIMAYAY SA BRGY. MABUA, SURIGAO CITY NASUNOG
Nasunog an isa ka panimayay sa Purok 5, Brgy. Mabua, Surigao City resulta sa napasagdan na niluto.
Sa nakuha na impormasyon nan RMN gikan sa City Fire Marshall SF04 Alberto Lerio, an panimayay na nasunog tagpanag-ija ni Erlinda Gebertas. Tagtudlo na alas 6:00 pa sa buntag kahapon nagluto ug tagbijaan na may baga pa sa may kusina. Kalit lamang na mitumaw an alarma sa sunog alas 9:30 sa buntag ug nadeklarar na fireout mga alas 10:00 na sa buntag. Tagtudlo na posible bisan kon baga na lamang, nodukot ini sa kahoy sa may kusina hangtud na milamoy an kayajo sa palibot. Bana-bana na danyos, an P7,000 labi na kay hinimo lamang sa light materials an kusina.
Otro na nagpahimangno si SF04 Lerio sa publiko na maglikay sa mga posible sinugdanan sa sunog, gawas sa napasagdan na niluto lakip na isab niini an mga X’mas Lights, pag-abot sa Disyembre ini an nahimong rason sa sunod-sunod na sunog. Awhag niini, kon matuyog na an mga tag-ija sa panimayay, angay na payungon isab, tangtangon an mga nakasaksak na X’mas Lights para wayay posibilidad sa short circuit o pagkasunog sa palibot.
